Adat Meukawen

Adat Mëukawen

Assalamu"alaikum Warahmatullah

Jarö duablah atëuh jëumala

Ulón bri salëum poma ngôn ayah

Rakan mëutuah mandum syèdara

Kruësëumangat Rahmat mëulimpah

Karônya Allah këupada hamba

Hudép lam dônya bëuna ibadah

Bèk singôh tëulah di Padang Mahsya

Lôn puphôn kalam dëungôn Bismillah

Lakè barakah Nibak Rabbana

Adat mëukawén bacut lôn kisah

Nëubri ya Allah bëutrôk ban pinta

Awai dilè phôn gëuayôn langkah

Rauh gëujak cah lé keluarga

Pihak blah agam rakan mëutuah

Kagëujak pëugah pihak blah dara

Hajat dikamö këunö trôh langkah

Sinyak Abdullah pihka dewasa

Jinö ka mëuhëut bungông si ulah

Sinyak Ramlah sona ka tanda

Tëuma gëujawëub laju lé bagah

Sinyak Ramlah gôhna nyang tanda

Mëunyôna hajat këubungông cëudah

Pintô tëupëuhah nëutamông sigra

Sëunang that hatè Alhamdulillah

Jinö lôn kisah tahap këudua

Kamö mëugisa bak bulëun siblah

Mëujak khitbah dëungon mé tanda

Supaya yakin bèk jëut këu gundah

Tëuntè nyang pëugah na urëung tuha

Adak jëulamé sinan pih jëulah

H'analé payah tanyö mëudawa

Mandum setuju cit ban duablah

Sëunang mëulëumpah haté gembira

Tëuma óhlhëuhnyan tahap mëunikah

Dëungô lón pëugah wahé syèdara

Ka h'ana trép lé sinyák Abdullah

Jak sambôt nikah ngôn sidrö dara

Watè lhëuh Haji ka gëucok langkah

Bulëun duablah bak tanggai dua

Tgk KUA nyang bri tausiyah

Dalam khutbah di Mëusëujid Raya

Gëubri naséhat sangat mëungarah

Hudép mawaddah lam rumôh tangga

Lakô ngôn binö bèkna mëutingkah

Mëunyôna salah bëurayek saba

Ayéb bëutatôp mubèk ta pëuhah

Malè tëuh lëupah ngôn urëung lingka

Óh béh sëulëusô nëubaca khutbah

Langsông pëunikah anëuknyán dua

Tëuma diwali ijab lelé bagah

Sinyak Ramlah nama gëubaca

Di ucap qabulbsinyak Abdullah

Nikah pih kasah Allah nëuridha

Nibak agama h'analé salah

Hukôm pihka glah hanlé mëudosa

H'ana trép lhëuhnyan rakan mëutuah

Pëugôt walimah mëuhei syédara

Gëumëukhanduri cukôp mëuriah

Hayëu mëulëumpah gëupasang ténda

Di urëung gampông jurông gëujak cah

Jitamông mudah moto ngôn honda

Gëu undang jamé ramé mëulëumpah

Pôma ngôn ayah ta kalôn tëuka

Nyang cukôp gabuëk pak gëuchik basyah

Untông pih bagah na panitia

Ladôm taguën bu ka dëungôn kuwah

Nyang cang bôh panah na apa Baka

Nyang dara-dara rumôh ji hiyah

Pocut Khadijah urëung bôh gaca

Këubit that tari sinyak Ramlah

Sang hi ta pelëugah pëurumôh Raja

Dëungôn pëulamina pih cukôp indah

Kunéng ngôn mirah ta kalôn rupa

Gëupëuduk sandéng sidara cëudah

Nyang pót-pót kipah adék Nurmala

Rombongan lintô pih trôh poh siblah

Gëusambôt bagah lé urëung tuha

Mubalah pantôn ka gëumëukisah

Dalam istilah gëukhëun sëumapa

Óhlhëuh nibaknyan ka gëuyuë langkah

Pôma ngôn ayah bèklé diluwa

Udalam rumôh cit gëubôh batah

Siplôh drö ayah limông blah bunda

Nyang patót-patót tëumpat gëukubah

Misëu ta pëugah pëurangkat desa

Mëunan cit bisan rakan mëutuah

Jaga marwah tanda mulia

Yôh gôh gëutamông gëudông bak tëurah

Nazam sipatah dóá gëubaca

Siprëuk brëuh padé lakè bëureukah

Nëubri Ya Allah hudép bahgia

Laén nibaknyan gëulakè mëuáh

Bak tëumpat luwah dimiyuëp ténda

Gëuyu pajôh bu gulè boh panah

Surè këumamah kuah dalica

Óh lhëuh khanduri lintô gëusëurah

Sëunambông lidah kalhëuh gëumita

Laju gëupëujók sinyak Abdullah

Cukôp that gagah muda perkasa

Barang pëunëuwô bandum gëulimpah

Misëu ta pëugah bajè ngôn ija

Dak ië raminét kuwéh këukarah

Boh appel mirah anggor India

Habéh gëusëubôt bandum gëusëurah

Urëungnyan ka glah ka habéh haba

Mu patna kurëung gëulakè mëuáh

Kadangna salah bèk jëut këu cupa

Mesjid Raya këubit that indah

Tujôh boh kubah sabôh mëunara

Adat mëukawén meusyén silëumpah

Bëujëut këu naskah adat budaya