Sëurah Lintô Barô

  Mëuhaba Bak Intat Lintöe

اَلْحَمْدُ لله الَّذِيْ أَرْسَلَ رَسُوْلَهُ بِالْهُدَى وَدِيْنِ الْحَـقِّ لِيُظْهِرَهُ عَلَى الدِّيْنِ كُلِّهِ وَلَوْ كَرِهَ الْمُشْرِكُوْنَ ، أَشْهَدُ أَنْ لَا اله إِلاَّ الله وَأَشْهَدُ أَنَّ مُحَمَّدًا رَسُوْلُ الله.اللهم صَلِّ عَلَى مُحَمَّدٍ وَعَلَى أله وَأَصْحَابِهِ أَجْمَعِيْنَ. أَمَّا بَعْدُ

Pujô ngôn syukur dilè nyang phôn that

Këu Po Hadharat nyang pëujëut álam

Nyangka gëubri këu gëutanyô sehat

Cit ka mëusapat lagenyô macam

Sëulawëut ngôn salëum akan Muhammad

Pang ulè ummat ban sigom álam

Këu mandum waréh al dëungôn sahbat

Sabé gëu peuingat urô ngôn malam

Keluarga gampông timu ngôn barat

Nyangka mëusapat inông ngôn agam

Këu bapak gëuchik dëungôn pëurangkat

Serta kerabat waréh ngôn insan

Këu tgk imum salëum horëumat

Pimpinan nëumat macam jurusan

Këu mandum gurè nyangna di tempat

Urëung pëutëupat hukôm isëulam

Takzém horëumat këu petua adat

Serta sahabat ngôn tuha lapan

Ketua pemuda ngôn ibu Pkk mëuhat

Sëurëuta sahbat inông ngôn agam

Dari gampông blang panyang kamô bëurangkat

Nit mëujak intat sidrô pangèran

Lintô nyang cëudah judô pih nyan cap

Lagè ibarat cit sidrô sultan

Óh angén timu ta labôh pukat

Óh musém barat riyëuk gëulombang

Lôn lakè mëuáh bëurayek that that

Kadang ka tëulat kamô mëudatang

Janji pôh siblah bëutrôk u tëumpat

Kôn lagè hajat nyangka nëu pëusan

Bëuthat bëunëudhet urônyô nëucarôt ngôn nëu upat

Jëut kamô nit bulukat ka dëungôn timphan

Tajak u sawang singgah côt kawat

Nyô h'ana mëukarat jép kupi sinan

Kamô dari gampông këunô bëurangkat

Na muba hai sahbat béôk këunangan

Na ranup sipriëk dëungôn pinëung klat

Gëutamah lom sikrak baték këumangan

Na ruti tabëu lam rumoh adat

Na silop jungkat lam bungkôh sinan

Bungkôh blah rôt déh pih h'ana kurëung that

Atra dari stabat gëupesan urônyan

Nyan këuh tgk nyangna bahan kamô pëusapat

Nak bèk kosong that anëuk wo bak tuan

Na kamö ba bacut këubungông Jarö 

Meunyö këu asö mubèk nëukira 

Barang cit bacut nyang Kamö pasö 

Pëuntèng atranyö këu tanda mata 

Asö nëupëusóh bungkôh nëupulang 

Bèk jëut këu utang gëutanyö dumna

Kamö lakèe izin bak tgk sekalian

Kamö jak riwang u gampông tëuma

Mëunyöna umu Tuhan briè panyang

Lusa mëurumpôk tëuman ta mëungiëng mata

Tgk intat dara barö lusa bèk cót urö timang

Poh siblah nyang rëumbang tgk ba sigra

Kamö lakèe meuàh lom bak tgk sekalian 

Adab ngón sopan h'ana kamö jaga

Kadangna langkah mëutajôe-tajoë

Mungkén na tutôe narit nyang gasa

Ban mandum kamö dari blang panyang

Mohon maàfkan ubéna nyang cëupa 

H'ana mëuturi kamö h'ana mëutuban 

Adat ngôn rëusam sinö budaya

Lôn cet awé ka dëungôn urôt

Lôn këunëuk pëugôt këu talô tima

Nëubôh nyang brôëk nëucok nyang gôt

H'an pu pëusëutôt adat yang h'ana

Lintö kamônyö tgk adak umpama kacang mantông ôen siön

Umpama jagöng mantông mëusutra

Ilmée agama hana gót mufôm

Pulom gurèe lôn nyan ilëumèe dônya

Tamsè umu lintö mantóng siumu jagông 

Sopan ngôn santón h'ana tëujaga 

Kamö serahkan këupada masyarakat 

Dëungôn peumangku adat alèm ulama

Nëutulông bimbing dëungôn nasehat 

Mangat bek sisat jalan Agama 

Bëuék mëusahô ngôn masyarakat 

Bëu muphôm adat dëungôn budaya

Òhnö mumada akhirul kalam

Dëungôn wassalam lôn ucap sigra

Hadanallah Wa iyyakum Ajmaìn Wassalamu'àlaikum wr wb 

  Mëuhaba Bak Prèeh Lintö

الْحَمْدُ ِللهِ رَبِّ الْعَالَمِيْنَ وَ صَّلاَةُ وَالسَّلاَمُ عَلَى أَشْرَفِ اْلأَنْبِيَاءِ وَالْمُرْسَلِيْنَ وَعَلَى اَلِهِ  وَصَحْبِهِ أَجْمَعِيْنَ أَمَّا بَعْدُ

Alhamdulillah tgk ta pujô Hadharat

Nyang pëujëut lëungkap ban sigôm álam

Nëu pëujëut laót mandum lat batat

Ngôn asôë mëuhat lëungkap di dalam

Sëulawëut salëum bëusabé tingat

Këu pang ulè umat Rasul janjôngan

Këu mandum waréh al-ngôn sahbat

Serta këurabat madum drônëuh nyan

Nyang lôntuan hormati pak gëuchik desa

Nyang cukôp saba bak gëupimpin rakyat

Bah pih tip urö gôbnyan di cela

Sabè tip masa gôbnyan di upat

Tetapi watè warga pëurlè këu NA

H'ana gëutunda tunda sigra gëuparaf

Òh lhëuhnyan tëuma këu imum mëulasah

Urëung nyang sëumëugah di bidang agama

Kaya ngón gasien agam ngón dara

Sabè tip masa këu góbnyan jihah

Ibarat môn brök ataupun môn tuha

Citna saja saja këu góbnyan ji pëugah

Walaupun mëunan tetap sabè lam saba

Cit góbnyan priëk ija òh tawô bak Allah

H'ana gëupileh gasiën ngôn kaya

Sampö bak lëubö manyéet yah tëuh góbnyan gëutém rhah

Nyang lôntuan hormati pada tuha pëut ngôn tuha lapan

Sabè gëusidang soso na dawa

Tëukëudi pakè sampé rö darah

Soso yang salah ka këunông dëunda

Lhëuhnyan tëuma këu mandum aparatur gampông

Këupala dusôn maupun ketua pemuda

Urëungnyan tugah gëujaga gampông

Bèkna tamu mëungunjông òh malam jula

Yang teristimewa sekali ke pada tgk² dan ummi²

Nyángka nëuhadiri bak undangan këurija

Baik yang jak ngôn honda atawa ngôn gaki

Walau ngôn kapai ië ataupun pëusawat garuda

Tëurimông gasèh kamö ucapkan

Këupada tgk serombongan nyangka trôk tëuka

H'ana tëulat tgk trôk datang

Dan h'ana halangan bak jalan raya

Sëulamat tgk katrôk nëudatang

Watè nëuriwang bëu Allah pëulara

Kamô mëulakè bak sidrô Tuhan

Dalam perjalanan bèkna bahaya

Sidéh binèh blang sigam koh nalëung

Bak sagô atëung ji pëuduëk raga

Ranup lam baté tika ka mëulëung

Mëuthè ka jamëun lintô trôk tëuka

Mungkén di blang panyang adat bak tgk kön lagèe nyöe

Bôh sigëutuë saho nyö kön h'ana that bèda

Tëuman bunöe na tgk mëutëuöh këu barang pëunëuwô

Tgk na nëublö nëupëugah sikilô saka

H'ana that mëuharap dikamö nyan hai tgk këu barang pëunëuwö

Nyang pëunténg gëutanyö urönyö bëujëut këu syèdara

Alhamdulillah lôn tëurimông ngôn dua jarô

Pu nyáng tgk puwô bu murumpôk fahla

Didewantara bla blé that kilat

Tanda hai sahbat ujëun mëugram-gram

Kamô tëurimông bahan nëu intat

Pëunëuwo lagak that këu adék intan

H'ana nyang kurëung hai rakan sahbat

Cukop that gap-gap nyan asô talam

Ija sëunalén pih gët that mëulipat

Bak sang di arab sidéh mu pesan

Tëuman bëuthat pih nyan tgk ba saka sikilô

Tëurasa bak kamö ka saboh raga

Adak umpama ië nyan sabôh bruëk

Bak kamö cangguek sang² abah kuala

Kakamö teurimông pu nyang tgk ba

Ngôn jarö dua dan dada lapang

Alhamdulillah bawaan tgk ba ka lôn teurimông

Ngôn jarö limóng ateuh jeumala

Mata urô lôp tgk siblah rôt barat

Tanda hai sahbat urô ka malam

Ngôn senang haté kamô mëu ucap

Mëukruë sëumangat para rombongan

Memang ka salah lagè lôn takat

Hukôm ngôn adat nëutém pëutimang

Dari gampông blang panyang tgk bëurangkat

Dëungôn nit jrôh that handai ngôn taulan

Lintô nyang nëuba rupa cëudah that

Sesuai that-that lagè harapan

Bëu jëut këu tanglông gampôngnyô mëuhat

Lagè ibarat lampu pëunëurang

Tujuan waréh këuno bëurangkat

Saknyô ka lëungkap nëubri laporan

Kamô cit mëutëupu lintô nyang nëu intat

Kalhëuh mëu ikat dëungôn cut intan

Òh geuwô keudéh dua urëungnyan tgk purunö

Òh geuwô keunö kamö nyang bina

Rayek that laba jinö di kamö

Ka mëutamah sidrö di dalam kk

Karëuna pukat ka mëusawak jaréng

Karëuna putèng ka mëusawak bara

Karëuna anëuk geutanyö uroë nyö ka tapëukawén

Gëutanyö nyang laén kajëut këu syèdara

Anëuk tgk kamö niët ibarat Payông 

Tëumpat mëulindông òh ujëun tëuka

Ibarat pëudëung didalam sarông 

Jëut pëuthëun gampông òh harö hara

Kamô lakè mëuáh atëuh kejanggalan

Atawa kesilapan nyang lëupah raya

Óh mëusambôt tgk mungkén h'ana sopan

Maklum hai taulan h'ana lôn saja

Mëunan cit rôt bidang makanan

H'ana méwah'an kamô sedia

Kadang dikuwah tëurasa masam

Ataupun rëuhang mëuáh lôn pinta

Kadang cit masam lëupah bôh makén

Kadang cit masén ka lëupah sira

Bëuraya mëuáh hai putéh licén

Adat mëukawén dikamô le that nyang cëupa

Òhnö mantông lôntuan akhiri

Wabillahi taufik wal hidayah wassalamu'alaikum wr wb