Hikayat Cut Mutia

Hikayat : Cut Nyak Meutia

=======================

Dëungôn Bismillah lôn puphôn kalam

Pujö këu Tuhan nyáng that muliya

Sëulawëut salëum këu Muhammadan

Rasul pilihan pang ulèe dónya

Këu Al ngôn sahbat seperjuangan

Mëusambóng lhëuhnyán dëungôn úlama

Takzém horëumat mandum lapisan

Inông ngôn agam tuha ngôn muda

Mangat takëunang jasa pahlawan

Sëujarah silam ulôn calitra

Gampông gëurëutö sinan hai rakan

Lahe cut intan bulëun purnama

Cut nyak mëutia nama gelaran

Anëuk tëusayang ayah ngôn pôma

Tëuma yang laén cit mandum agam

Jinô hai rakan lôn sebut nama

Tëuku ibrahim nyan këuh hai rakan

Wajah sép tampan hana bandéngsa

Tëuku muhammad syah lhëuhnyan hai taulan

Tëuku cut hasan gagah perkasa

Muhammad ali mëuhi gurangsang

Mandum urëungnyan sep tëuga-tëuga

Tëuma di ayah cit ulèe balang

Sidrö pimpinan sinan lam desa

Tëuku ben daud yangna gelaran

Dalam incaran kafe belanda

Han gëutém tundók tëugah hana ban

Bumö gëusayang gëubela bangsa

Hantomna karu rakyat gëupaban

Dalèh pih gobnyan sidrö ulama

Urëung tëuhormat sabè jisegan

Mëunyö le lawan tëumakót raya

Tëuma nan binö Cut Jah e taulan

Get that gëutimang cut nyak meutia

Gëuayón dôdi gëudóda sayang

Kalimah Tuhan sabè gëubaca

Lam ayôn ija siputik mancang

Bit hantôm lëukang sabé gëujaga

Gëujaga pijét urö ngôn malam

Bèk jikap badan si ayëum mata

Urö si urö rayek anëuk nyan

Kitab Al-Qur'an pëurunö eja

Hukôm agama mandum gëupëutrang

Pëusurôh larang poma pëubèda

Cut bulëun pëut blah carông kôn wayang

Mandum ék jipham ilmè agama

Kamëuóh cara pubuët sembahyang

Senang hanaban urëung chik dua

Hingga ka dara anëuk pahlawan

Mëucahya bintang lagak that rupa

Ngôn bajè adat di hias badan

Siluwëu panyang mëusulam sutra

Bajèe boh tip mëuh warna jëumëulang

Bak ôek jipasang ulèe jëurama

Mëulëumpah tari boh langgói manyang

Mëusô yang pandang jitëuka suka

Mëuputa alét glëung këuhiasan

Hantôm jilëukang bak gaki dua

Tëuma yang harôk gob kalôn badan

Tabóh tamselan lagèe biola

Ramèe yang naksu galak jak pinang

Sëubab rupawan cut nyak mëutia

Karëuna umu gohlom gót matang

Urëung chik hadang kumbang këulana

Ban ka dewasa kana yang pinang

Tan lé halangan urëung ba pëuha

Ngôn Syik Muhammad mëunikah rijang

Gëubri pasangan sijudó dua

Tëuku Syik Tunóng sëuréng gôb hei nan

Caróng bak muprang ató bintara

Stratègi taktik sép jëut gëurancang

Mëuôh that lawan kaphe bëulanda

Rata pëulosok gëukirém rijang

Urëung mëunyamar këumata-mata

Tukang jak pantö pukëuh na aman

Kadang pih kadang kompeni tëuka

U simpang ulim phón gëujak sëurang

Gëugrak pasukan lawan bëulanda

Siap ngôn alat pëudëung ngôn parang

Rincóng sep tajam bak cut mëutia

Óh tróh ublang nië bak binèh jalan

Mëulëumpah rëumbang kontak senjata

Blah déh ngôn bëudé blahnö mëuriam

Na chit ngôn parang gëumaju sigra

Prang pih mëucambók kaphe gëucincang

Putóh mëukhan-khan darah mëukëuba

Na yang ngôn bulóh gëurëulóh badan

Man sabôh kawan maté bëulanda

Gëucók dum bëudé laju gëugulam

Gëupuwö rijang këudéh u desa

Hingga bëurita rata tëusebar

Trók bak atasan di kuta raja

Tëuka mëungamók haté mëuguncang

Bëungèh pimpinan awak bëulanda

Ngôn bagah-bagah jikrah pasukan

Tëuntra gabungan tróh dari luwa

Tëuma syik tunóng carông pikiran

Laén gëurancang ide gëuputa

Pëugôt khanduri mandum gëu undang

Padahai mandumnyan cit pura-pura

Kaphé kasibók jinëuk jak këunan

Hajat disëurang këunëuk tuëng bila

Tëutapi tëumpat payah jëumëurang

Kruëng payah sëubrang umatang raya

Rot kruëng sampônip jaló disëubrang

Dua bôh kawan pasukan jiba

Lëungkap ngôn bëudé mandum alat prang

Sëurta mëuriam sép raya-raya

Hana trép lawét lam perjalanan

Laju gëuhadang lé cut mëutia

Tëuku syik tunông pihna disinan

Dalam rombongan sëubëuh lagóina

Laju terjadi kontak mëuriam

Sëurang mëunyerang hana pré rëuda

Rotdéh tëuga rotnó gurangsang

Këubit sëuimbang lawan bëulanda

Dudö gëumaju ngôn izin Tuhan

Kaphé gëukuran kabéh dum luka

Kabéh dum umu dipô mëulayang

Sinan mëutimphan tubóh cëulaka

Na yang tumèe pluëbg ladóm tëurajang

Dak bëudé tinggai hana jikira

Kakëuh pëusapat këu awak islam

That panyang-panyang bëude bëulanda

Mëunan këuh jamëun urëung pëujuang

Haté tan guyang nanggrö gëubela

Kón lagèe jinö tanyö uët kalang

Yang sëunang sëunang cit bijèh jawa

Jinö këubiri tuka ngôn musang

Mëunan tamselan lôn bóh umpama

Na bacut asö jibri lam rëugam

Bah pulô sabang nyang gôb këulola

Angén di laót jipót gëulumbang

Kawé ta tambang di miëng kuala

Bak kisah bunö jinö tariwang

Hikayat awai nak mëuhô punca

Bëudôh kompeni oprasi rijang

Hajat tujuan seutôt mëutia

Tëutapi tandëuh mubacut bayang

Rugö hanaban habéh tëunaga

Dudö jipiyôh bak tëumpat aman

Jikira sinan lëupie that desa

Dalam mëunasah disantai-santai

Gampoeng lón pëutrang mëunasah paya

Get that jiduëk-duek mëusëunang-sëunang

Komandan lhëuhnyan lalèe mubaca

Tan lé jitëugah urëung jak këunan

Inông ngôn agam pih katrôh tëuka

Mëusambông lom ukëu.......