Jak Mëulakè/Cah Rauh

 Cah Raúh/Jak Mëulakèe 

بِسْمِ اللهِ، والْحَمْدُ للهِ، وَالصَّلاَةُ وَالسَّلَامُ عَلَى رَسُوْلِ اللهِ، وَعَلَى اٰلِهِ وَصَحْبِهِ وَمَنْ وَالَاهُ, أَمَّابَعْدُ

Alhamdulillah ta Pujô Tuhan

Yang pëujëut alam langét ngôn dónya

Yang pëujëut laót dëungôn daratan

Nyang pëujëut insan mandum manusia

Óh lhëuh ta Pujô këu sidrô Tuhan

Sëulawëut sajan akan saidina

Sëulawëut salëum këu Muhammadan

Rasul Pilihan Pang Ulè Dônya

Kruësëumangat Rahmat mëuhimpôn

Këu gëuchik gampông lôn pu muliya

Këu Tgk Imum ngôn ulè jurông

Sëurëuta kawôm mudi ngôn muda

Mandum tuha pëut hormat nibak lôn

Nyang pëukông hukôm didalam desa

Salëum ban mandum pëurangkat gampông

Nyang kamô sanjông ketua pemuda

ulôntuannyô sëunambông lidah

Haba amanah sidéh bak keluarga

Dëungôn karëuna nyan kamô trôk langkah

Karëuna tugah bak sidrô warga

Nibak simalam anëuk kamö na gëumëulëumpö

Mëudéh ngôn mëunô lëumah rahsia

Gëulumpô di sinö na bungöng sitahön

Mubèe that haröm sampô u luwa

Gét that nëupapah Tgk hai nëutingkuë sëuòn

Bungông dalam öen cëudah that rupa

Ramé trôk kumbang këunö mëurön-rön

Bungông lam këubôn gét that jisuka

Nyang jëut trôh langkah urônyö ulôn

Bungông sitahôn pu kana so rantè

Pu kana so tanyông bungông dalam öen

Jinöe bak ulôn tëungku hai cuba nëulahè

Nafsu këu bungông runông tajak mita

Bèk ta gëulawa cabëung jih patah

Nibak pëurëudè dilè gëuyu jak usaha

Mëunan pribahasa urëung tuha pëugah

Dëungôn sëubabnyan tröh langkah kamö 

Këu soai bungông nyö pukëuh kana so tanda?

Mëunyô golomna urëung nyang tëuka këuno

Tgk brië bungôngnyô kamô ba tanda

Óhnô këuh dilè haba bak kamô

Lôn pulang jinô këu pihak këuluarga

Cukôp mëuharap bak tëungku disinô

Dak jëut kamônyô bèk trôk këucèwa

 Tëurimông Jamè Cah Raúh

الْحَمْدُ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ، وَنَعُوذُ بِاللهِ مِنْ شُرُوْرِ أَنْفُسِنَا، وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَلاَ مُضِلَّ لَهُ، وَمَنْ يُضْلِلْ فَلاَ هَادِيَ لَهُ ،َأَشْهَدُ أَنْ لاَ إِلَهَ إِلاَّ اللهُ وَحْدَهُ لاَشَرِيْكَ لَهُ , وَأَشْهَدُ أَنَّ مُحَمَّدًا عَبْدُهُ وَرَسُوْلُهُ. اَللَّهُمَّ صَلِّ وَسَلِّمْ وَبَارِكْ عَلَى سَيِّدِنَا مُحَمَّدٍ وَعَلَى آلِهِ وَصَحْبِهِ اَجْمَعِيْنَ. 

   

Alhamdulillah Pujô Hadharat

Kuasa that-that sidrô Rabbana

Nyang pëujëut alam mandum lat batat

Timu ngôn barat lëungkap sigala

Sëulawëut salëum akan Muhammad

Pang ulè ummat ban sigôm dónya

Dëungôn na lahé Nabi Muhammad

Murumpôk Rahmat asô lam dónya

Kruësëumangat Rahmat bak Tuhan

Gëutanyô Insan ta Syukur bëuna

Takzém horëumat nibak lôntuan

Këu mandum rombôngan nyang katrôk tëuka

Këu Tgk imum kamô mulyakan

Nyang mat jurusan pimpin agama

Pada pak gëuchik lôn bri penghormatan

Sëurëuta sajan pëurangkat desa

Mandum tuha pëut ngôn tuha lapan 

Nyangna jabatan di dalam desa

Salëum takzém kamô mulyakan

Inông ngôn agam nyang katrôk tëuka

Bak bëuradëun timôh lam gunông

Kayèe mëuganông bak mëudang ara

H'ana soë rantè h'ana söe tanyông

Bungôngnyan mantông bak cadëun muda

Lam këubôn raja gëupula bungông

Tanda na inông bak kamô si anëuk dara

Ngôn mangat haté kamô tëurimông

Bak kamô bungông bak tëungku raja

Jëumpa biru di gampông tibang

Bè mëudrám-drám ban sisëulingka

Tajak rôt tungkôp bëutrók u tibang

Bungông lam karang gôlom so tanda

Boh mëunjèe tatuka ngôn brëuh

Boh hanëuh tatuka ngôn padè

Këu hai jëunamée atau pun pëuha tëungku dëungô bëudëuh

Siplôh manyam mëuh tëungku hai bëu ikhlah hatè

Nëujakba kumbang tëungku bôh haté

Bak kamö sang glè mëunan umpama

Nëubôh ngôn rangkëum bèk gob tanyônglè

Bungông bak tangkè tëungku bôh tanda

Mungkèn untuknyö jëut ta akhiri dilèe

Siattëuk mëutëunte ta pëugah-pëugah haba

Masalah ba ranuëp jëut tangiëng watè

Pajan nyang tëuntè tgk ba pëuha

Hadanallah Waiyyakum Ajmaîn Wassalmuàlaikum wr wb